Gagnrýni leiðir til handtöku 22 fíkniefnasala í Kaupmannahöfn

Lögreglan á Vesturbrú í Kaupmannahöfn hefur brugðist við gagnrýni frá sjónvarpsstöðinni TV2 með því að handtaka 22 fíkniefnasala á síðustu tíu dögum.

Fyrr í sumar birti sjónvarpsstöðin TV2 úttekt á störfum lögreglunnar í Vesturbrúhverfinu í borginni. Sérstaklega var tekið fram að svo virðist sem að lögreglan hafi notað mun meiri mannskap gegn vasaþjófum í hverfinu en fíkniefnasölumönnunum. Hér skal tekið fram að vasaþjófar, einkum frá Austur Evrópu, voru töluverð plága á götum Kaupmannahafnar í sumar.

Fíkniefnasalarnir sem hér um ræðir selja einkum sterk efni eins og amfetamín, kókaín og í sumum tilvikum heróín. Þess vegna vakti umfjöllun TV2 töluverða athygli.

Kaj Lykke Majlund lögreglustjóri á stöðinni Station City á Vesturbrú segir í viðtali við Ritzau fréttastofuna að starfsmenn hans beini nú öllum kröftum sínum í að stöðva söluna á sterkum fíkniefnum í hverfinu.

Það fylgir sögunni að meðal þessara 22 sölumanna sem handteknir hafa verið er enginn danskur ríkisborgari og raunar hafa einungis fáir þeirra dvalarleyfi í landinu.