Stúlkan sem lifði af gæti enn lifað eðlilegu lífi

Fjögurra ára stúlka sem lifði af skotárás í frönsku Ölpunum og beið hreyfingarlaus undir líki móður sinnar í 8 klukkustundir hefur enn möguleika á að lifa allt að því eðlilegu lífi. „Hún þarf að komast aftur heim til sín, í sitt eigið rúm og njóta umönnunar fólks sem hún treystir,“ segir sérfræðingur.

Bresk fjölskylda fannst myrt í bifreið í frönsku Ölpunum á miðvikudagskvöld. Tveir kvenmenn létu lífið og einn karlmaður. Auk þeirra voru tvær stelpur í bílnum sem lifðu báðar af, önnur illa særð. Fjögurra ára stúlkan slapp ómeidd og faldi sig undir pilsfaldi annarrar konunnar.

„Það sem þessi stúlka hefur mátt þola er óhugnanlegt en ekki einstakt. Það kemur fyrir að börn verði vitni að morði foreldra sinna – ósjaldan er morðinginn hitt foreldrið,“ segir sérfræðingur. Barnið verður fyrir miklu áfalli en önnur dæmi benda til þess að börn geti unnið úr slíkum áföllum.

„Stundum loka börn hreinlega á svona minningar. Oft muna þau ekki atburði sem fullorðnum þykja of hryllilegir til að hægt sé að gleyma þeim,“ segir Julie Stokes, sálfræðingur, í viðtali við breska blaðið The Guardian.

Því telur Stokes mikilvægt að spurningar lögreglunnar veki ekki upp minningar sem þessi ungi barnsheili hefur lokað á svo hann þurfi ekki að vinna úr þeim. Það gæti sett lögregluna í nokkuð erfiða stöðu því að stúlkurnar tvær sem komust lífs af gætu verið besti lykill lögreglunnar í rannsókn sinni á málinu, en ýmislegt bendir til að um leigumorð hafi verið að ræða.

Stokes telur mikilvægt að eðlilegt andrúmsloft verði skapað kringum stúlkuna svo hún fái tíma til að vinna úr atburðunum. Ef hún fái aðstoð færustu sérfræðinga séu allar líkur á að hún geti lifað eðlilegu lífi það sem eftir er.