Vildi selja fíkniefni en sendi löggu SMS

Það hafa eflaust margir sent textaskilaboð í vitlaust símanúmer. Í flestum tilvikum er beðist afsökunar og málið er úr sögunni. En það var þó ekki alveg svoleiðis hjá þrjátíu og sjö ára gömlum Bandaríkjamanni á dögunum.

Maðurinn, sem heitir Aaron D. Templeton og er frá Idaho, ætlaði að leita af mögulegum kaupendum á metamfetamíni. Hann sendi því skilaboð á félaga sinn, þar sem hann spurði hvort hann vissi um einhvern sem langaði að kaupa af honum fíkniefnið.

Svo virðist sem maðurinn hafi stimplað inn vitlaust númer, því hann sendi textaskilaboðin á fulltrúa í fíkniefnadeild lögreglunnar í Lewiston, bænum þar sem hann býr.

Lögreglufulltrúinn hélt í fyrstu að félagar hans í löggunni væru að gera grín í sér, en hann áttaði sig á því fljótlega að svo væri ekki. Hann sendi því til baka að hann væri til í að hitta manninn, og greiða honum 150 dollara fyrir metamfetamínið.

Þegar þeir hittust var Aaron handtekinn. Hann mætti fyrir dómara á miðvikudaginn, þar sem hann hefur verið ákærður fyrir að hafa milligöngu um fíkniefni.

Lögreglan segir að ákæra hefði aldrei komið til, ef hann hefði ekki sent skilaboðin í rangt númer.