Aleppo án rennandi vatns

Nýskipaður erindreki Sameinuðu Þjóðanna í Sýrlandi, Lakhdar Brahimi, mun funda með utanríkisráðherrum Arababandalagsins í Kaíró í Egyptalandi á næstu dögum. Brahimi hefur nú formlega tekið við kyndlinum frá Kofi Annan sem sagði starfi sínu sem friðarsamningamaður lausu á dögunum. Brahimi mun nú reyna að miðla málum milli stríðandi fylkinga í landinu.

Ekkert lát er á óöldinni í Sýrlandi. Að minnsta kosti 100 voru drepnir átökum uppreisnarmanna og öryggissveita yfirvalda dag. Sem fyrr var hart tekist á tveimur helstu borgum landsins, Damaskus og Aleppo.

Öryggissveitir blésu til stórsóknar í dag og náðu á ný tökum á Hanano hermannaskálunum í norðausturhluta Aleppo. Uppreisnarmenn hertóku búðirnar í gær. Í átökunum í dag rofnuðu vatnsleiðslur og er stór hluti Aleppo, þar sem um þrjár milljónir manna búa, nú án rennandi vatns.

Þá brutust út átök milli palestínskra uppreisnarmanna og stjórnarhermanna í Damaskus, höfuðborg Sýrlands, í dag. Frá því að stjórnarbyltingin í Sýrlandi hófst fyrir átján mánuðum hafa Palestínumenn sem búsettir eru í Sýrlandi löngum forðast átök og staðið á hlíðarlínunni. Nú virðist hins vegar breyting hafa orðið á og hafa ungir Palestínumenn tekið höndum saman við uppreisnarmenn í landinu.

Voveiflegt atvik átti sér síðan stað við landamæri Sýrlands og Íraks fyrr í dag. Þá rigndi sprengjukúlum yfir lítinn írakskan bæ þar sem sýrlenskir flóttamenn hafa haldið til undanfarið. Fjögurra ára gömul stúlka lést í árásinni en fjórir aðrir særðust.

Talið er að um 23 þúsund óbreyttir borgarar, uppreisnarmenn og stjórnarhermenn hafi fallið frá því að stjórnarbyltingin hófst í Sýrlandi.