Kókaínneysla á drykkjukvöldi Harry Bretaprins í Las Vegas

Svo virðist sem fíkniefni hafi verið til staðar í töluverðu magni á alræmdu drykkjukvöldi Harry Bretaprins á lúxushóteli í Las Vegas í síðustu viku.

Nú hefur einn af gestum prinsins þetta kvöld sagt frá kókaínneyslu sem fram fór á herberginu ásamt neyslu fleiri fíkniefna.

Það er vefsíðan radaronline sem greinir frá þessu og birtir viðtal við þennan gest sem vill ekki koma fram undir nafni því hann segir að þetta hneyksli sé af áður óþekktri stærðargráðu.

Gesturinn segir að þetta kvöld þar sem svokallaður nektarbilljard fór fram á herbergi Harrys hafi verið verulega villt. Hluti af viðstöddum voru að nota kókaín á herberginu.

Gesturinn segir einnig að flestir sem mættu hafi annaðhvort verið undir áhrifum ofskynjunarsveppa eða hafi reykt marijúana áður en þeir komu á herbergið.

Eins og kunnugt er af fréttum voru teknar nektarmyndir af prinsinum þetta kvöld og þær birtar á netinu. Þar að auki mun vera til myndbandsupptaka af prinsinum sem þykir mun svæsnari en nektarmyndirnar.