Maður ákærður fyrir að gefa rangan vitnisburð í Sigrid-málinu

Lögreglan í Osló hefur ákært mann fyrir að gefa falskan vitnisburð í Sigrid-málinu sem skekið hefur norskt samfélag að undanförnu.

Eins og kunnugt er hvarf sextán ára gömul stúlka fyrr í ágúst og er talið að hvarf hennar hafi borið að með saknæmum hætti. Maðurinn sem er ákærður fyrir að gefa falskan vitnisburð hefur áður hlotið dóm fyrir nauðgun, eftir því sem fram kemur á vef VG.

„Við getum staðfest að eitt vitni í Sigrid-málinu hefur verið ákært fyrir falskan vitnisburð. Vitnið hefur verið í skýrslutökum," segir Hanne Kristin Rhode hjá lögreglunni í Osló í tilkynningu sem send var fjölmiðlum í morgun.