Grænlendingar vissu ekki af 6,6 stiga jarðskjálfta í grenndinni

Á svipuðum tíma og jarðskjálfti varð í Bláfjöllum upp á 4,6 stig á Richter í gærdag varð stór jarðskjálfti upp á 6,6 stig á Richter á hafsbotninum milli Grænlands og Jan Mayen.

Sá skjálfti fannst vel á Jan Mayen en virðist alveg hafa farið framhjá Grænlendingum.

Í kjölfar skjálftans höfðu margir danskir fjölmiðlar samband við íbúa í bænum Illoqqortoormiut á austurströnd Grænlands sem er í aðeins rúmlega 400 kílómetra fjarlægð frá upptökum skjálftans. Íbúarnir höfðu hinsvegar ekki hugmynd um að þessi skjálfti hefði orðið fyrr en dönsku fjölmiðlarnir sögðu þeim frá honum.