Clint Eastwood með undarlega ræðu á flokksþingi

Ræða bandaríska stórleikarans og kvikmyndagerðarmannsins Clint Eastwoods á flokksþingi Repúblikana í Tampa í gær hefur vægast sagt fallið í grýttan jarðveg í Hollywood.

Eastwood steig á svið í gær við mikinn fögnuð Repúblikana. Leikarinn, sem er áttatíu og tveggja ára gamall, er ötull stuðningsmaður Mitt Romneys, forsetaframbjóðanda Repúblikana.

Eastwood beindi spjótum sínum að Barack Obama, Bandaríkjaforseta, og það með leikrænum tilburðum. Hann talaði í raun við auðan stól mest allan tímann og lét sem Obama sæti fyrir svörum.

Fjöldi leikara, leikstjóra og áhrifamanna í Hollywood hafa lýst yfir undrun sinni vegna ræðunnar.

Hægt er að sjá ræðuna í myndskeiðinu hér fyrir ofan.