Báðust afsökunar á veðurspánni

Veðurfréttamenn BBC fréttastofunnar báðust í gær afsökunar á því að hafa spáð rangt fyrir um veðrið. Í síðustu viku höfðu veðufréttamennirnir sagt frá því að von væri á sólskini og hlýju veðri á sunnudeginum. Það gerði hins vegar úrhellisrigningu á suðausturhluta Englands í gær.

Philip Avery veðurfréttamaður tók sérstaklega fram í yfirlýsingu á BBC að það væri ekki hægt að kenna spátölvunum um, því þær hefðu sýnt fram á að það yrði rigning og þrumuveður.

Hann taldi hins vegar að það væru ekki næg gögn sem sýndu að þetta myndi ganga eftir og sagði frá því að líklegast yrði sól og blíða - sem reyndist ekki raunin.