Lokað fyrir World of Warcraft í Íran

Bandaríski tölvuleikjaframleiðandinn Blizzard hefur lokað fyrir aðgang að fjölspilunarleiknum World of Warcraft í Íran. Er þetta gert í kjölfar hertra refsiaðgerða yfirvalda í Bandaríkjunum gegn Íranstjórn.

Hundruð spilara í Íran tilkynntu á dögunum að þeir gætu ekki tengst tölvuleiknum. Í kjölfarið birti Blizzard yfirlýsingu á heimasíðu sinni þar tilkynnt var að viðskiptaþvinganir væru ástæðan fyrir þessu.

Íranskir WOW-spilarar hafa þó getað tengst leiknum í gegnum erlenda staðgengilsþjóna.

Til að bæta gráu ofan á svart mun Blizzard ekki endurgreiða spilurum í Íran fyrir aðgang að tölvuleiknum. Í tilkynningu Blizzard kemur fram að viðskiptaþvinganir Bandaríkjastjórnar geri fyrirtækinu ókleift að stunda viðskipti af einhverju tagi við Íran.