Stökkbreytt fiðrildi frá Fukushima

Geislavirkni í kjölfar kjarnorkuslyssins í Fukushima í Japan virðist hafa leitt til stökkbreytinga hjá fiðrildum á svæðinu. Vísindamenn segja að fiðrildin hafi öðruvísi fætur, vængi og fálmara en gengur.

Vísindamenn bjuggust ekki við afgerandi niðurstöðum því talið var að skordýr væru ekki viðkvæm fyrir geislavirkni. Því urðu niðurstöðurnar óvæntar.

Vísindamennirnir söfnuðu fiðrildum á svæðinu tveimur mánuðum eftir slysið. Þegar vísindamennirnir ræktuðu fiðrildin á rannsóknarstofum komu stökkbreytingarnar fram hjá næstu kynslóðum.

Ákveðið var að safna fiðrildum aftur á svæðinu og það var gert 8 mánuðum eftir slysið. Þá var tíðni stökkbreytinga meira en tvöföld miðað við sýnin sem tekin voru áður. Ástæðan er rekin til þess að fiðrildin nærðust á menguðum mat og vatni þá mánuði sem liðu frá slysinu.

BBC segir frá.