Aron Einar orðinn fyrirliði íslenska landsliðsins

Aron Einar Gunnarsson hefur verið skipaður fyrirliði karlalandsliðs Íslands í knattspyrnu. Þetta kom fram á blaðamannafundi í höfuðstöðvum KSÍ í Laugardal í dag.

„Það er ákveðið stolt að bera fyrirliðabandið og ég er ánægður með það. Ég hef verið að vinna að því að fá fyrirliðabandið og að hafa fengið það svona ungur er glæsilegt. Ég er stoltur af því," sagði Aron Einar. Hann sagði Lars Lågerback hafa tilkynnt valið á landsliðsfundi í gær.

„Hann hafði reyndar rætt við mig um það eftir Frakka og Svíaleikinn. Hann var ánægður með hópinn í leikjunum tveimur og við gerðum fína hluti í þeim leikjum. Hann vill greinilega halda því áfram," sagði Akureyringurinn sem bar fyrirliðabandið í landsleikjunum fyrrnefndu.

Fyrsti leikur Arons Einars með Cardiff í Championship-deildinni á Englandi fer fram á föstudag. Á blaðamannafundi Lågerback í gær kom í ljós að Malky Mackay, knattspyrnustjóri Cardiff, hafði verið í sambandi við Svíann varðandi hversu mikinn þátt Aron Einar tæki í leiknum.

„Þjálfararnir hafa talað saman og þetta er undir þeim komið. Ég vil ekki pirra neinn svo við sjáum bara hvað gerist," sagði Aron Einar aðspurður um hve mikinn þátt hann tæki í leiknum.