Ólympíuleikarnir voru stærsti sjónvarpsviðburður Bandaríkjanna

Ólympíuleikarnir í London voru stærsti sjónvarpsviðburður í Bandaríkjunum frá upphafi. Yfir 219 milljón bandarískir áhorfendur fylgdust með leikunum.

Umfjöllun sjónvarpsstöðvarinnar NBC um Ólympíuleikana í London fékk mesta áhorf sem spurst hefur af í bandarísku sjónvarpi. Stöðin greindi frá því að um 31 milljón áhorfenda hafi að meðaltali horft á útsendingar frá leikunum á besta tíma. Stöðin sjónvarpaði 5.535 klukkutímum af efni frá leikunum.

Sjónvarpsstöðin hlaut nokkra gagnrýni fyrir að sýna ákveðnar keppnisgreinar ekki í beinni heldur fresta þeim svo þær hittu á betri tíma í sjónvarpi.

Lokaathöfn leikanna á sunnudaginn fékk áhorf yfir þrjátíu milljóna Bandaríkjamanna. Athöfnin var þó trufluð þegar sjónvarpsstöðin ákvað að sýna nýjan skemmtiþátt og fréttir í miðjum klíðum.

BBC segir frá.