Breski herinn verður lengi að jafna sig eftir Ólympíuleikana

Það mun taka breska herinn um tvö ár að jafna sig eftir Ólympíuleikana í London. Um 18.000 hermenn voru fluttir fá stöðvum sínum og til Lundúna, sumir með stuttum fyrirvara.

Hershöfðinginn Peter Daulby segir í samtali við Guardian að framvinda mála á Ólympíuleikunum ætti að vekja þá til umhugsunar sem vilja endilega minnka herafla Breta. Landið gæti þurft á her að halda þó hann sé ekki notaður í stríðsrekstur.

Daulby kallar Ólympíuleikana stærstu friðaraðgerð breska hersins frá upphafi. „Þetta sýnir okkur bara hætturnar við að skera herinn niður. Ef við minnkum heraflann, vitum við þá hvað við erum að missa?" segir hann og bendir á að herinn hafi brugðist við kallinu með skjótum hætti.

Upphaflega áttu aðeins 5 þúsund hermenn að vera fluttir til Lundúna vegna Ólympíuleikanna. Þegar upp var staðið urðu þeir 18 þúsund, bæði vegna þess að skipuleggjendur leikanna varmátu þörfina á starfsfólki og vegna þess að fyrirtækið G4S ofmat möguleika sinn á að safna starfsfólki.

Hermennirnir voru margir hverjir kallaðir til án mikils fyrirvara og nú mun taka nokkurn tíma að koma hlutum í samt horf aftur.