Breskir hermenn tengdir við morð á vændiskonu

Bresk yfirvöld aðstoða nú yfirvöld í Kenýa við morðrannsókn á tuttugu og eins árs kenýskri stúlku. Talið er að breskir hermenn beri ábyrgð á dauða hennar.

Agnes Wanjiru-Wanjiku hvarf frá hóteli í bænum Nanyuki í Kenýa í lok mars á þessu ári. Í byrjun júní fannst svo lík hennar í tanki á lóð hótelsins. Fréttastofan SkyNews fjallar um málið í dag.

Vitni sem fréttastofan hefur talað við fullyrða að þau hafi séð stúlkuna á hótelinu 31. mars í fylgd tveggja breskra hermanna, stuttu áður en hún hvarf. Agnes var vændiskona en í bænum dvelja breskir hermenn áður en þeir fara til Afganistan.

Bresk yfirvöld hafa verið upplýst um þessar upplýsingar sem lögreglan rannsakar. Talsmaður breska varnarmálaráðuneytisins segir að rannsóknin sé í höndum kenýsku lögreglunnar. „Við skiljum að einstaklingar sem voru á svæðinu á þessum tíma, hugsanlega breskir hermenn, gætu verið kallaðir til sem vitni í málinu."

Umfjöllun Sky