Svindlaði í Scrabble-móti - faldi auða skífu innanklæða

Ungur þátttakandi í alþjóðlegru Scrabble-móti sem fer nú fram í Bandaríkjunum var vísað úr keppni eftir að dómarar urðu þess varir að hann faldi auða-skífu innanklæða. Á skífunum eru bókstafir og gefa þeir mismikið af stigum en í spilinu eru einnig nokkrar auðar skífur, sem gilda sem allir bókstafir.

Mótið er haldið árlega í Orlando í Flórída en vinningshafinn fær rúmlega eina milljón í verðlaun. Mótshaldarar hafa ekki gefið upp nafn þess sem svindlaði vegna aldurs. Þetta er í fyrsta skiptið sem svindl hefur uppgötvast á mótinu.

Fyrir áhugasama þá er David Gibson, sextíu og eins árs íbúi í Suður-Karólínu, efstur eins og staðan er núna en keppendur eru alls 350 talsins.