Bandaríkjamenn óðir í Kalashnikov

Bandaríkjamenn eru nú á meðal stærstu viðskiptavina rússneskra vopnaframleiðenda. Izhevsk vopnaverksmiðjan í Rússland hefur séð betri tíma.

Rússneski herinn hefur nú hætt að nota vinsælustu afurð verksmiðjunnar, Kalashnikov árásarriffilinn, og í kjölfarið þurftu stjórnendur fyrirtækisins að leita á ný mið.

Talið er að verksmiðjan hafi framleitt rúmlega 100 milljón AK-47 riffla á síðustu áratugum. En eftir innreið kínverskra eftirlíkinga á markað hefur eftirspurn eftir Kalashnikov hrunið. Á síðustu árum hefur fyrirtækið einblínt á sölu vopna til einstaklinga og er nú talið að um sjötíu prósent þeirra vopna sem fyrirtækið selur sé ætlað til einkanota.

Þessi nýi markaður er Bandaríkin, en svo virðist sem að vopnaáhugamenn þar í landi séu afar hrifnir af vörum Kalashnikovs. Og er það vafalaust sögulegt vægi AK-47 sem skiptir sköpum. Vopnamarkaðurinn í Bandaríkjunum er risavaxinn og veltur tugmilljörðum króna á hverju ári. Sala á rússneskum vopnum í Bandaríkjunum jókst um fjórtán prósent á síðasta ári.

Tæplega helmingur allra riffla sem verksmiðjan framleiddi á síðasta ári fór til Bandaríkjanna. Þetta þýðir að Bandaríkjamenn kaupa jafn mikið af AK-47 hríðskotarifflum og rússneska lögreglan.