Gleðiganga í Tékklandi og panda tvíburar í Kína

Stöð2 leit við í gleðigöngu í Tékklandi, fylgdist með tveimur pandahúnum koma í heiminn og fræddist um mótmæli í Suður Afríku í heimshorni.

Þúsundir manna söfnuðust saman í Tékklandi í dag og fögnuðu Hinsegin dögum í annað sinn í sögunni í landi þar sem samkynhneigð þykir ekki jafnsjálfsagt fyrirbæri og annars staðar.

Almennt séð var gleðin ríkjandi en þó stilltu fulltrúar nokkurra trúfélaga sér upp og mótmæltu hátíðinni með svívirðandi skiltum eins og þessu, en þar stendur „Samkynhneigð er leiðin til helvítis."

Tveir pandahúnar komu í heiminn í dýragarði í Suður-Kína á miðvikudaginn var. Á þessum myndum sjást tvíburarnir gefa frá sér afar sérstæð hljóð um leið og þeir koma í heiminn. Móðirin yfirgaf fljótlega annan tvíburann því við náttúrulegar aðstæður geta pandabirnir aðeins séð um einn hún í einu. Vísindamenn tóku þá yfirgefna húninn upp á sína arma.

Um fimm þúsund námumenn í Suður Afríku söfnuðust saman í dag, kyrjuðu mótmælasöngva og kröfðust afsagnar forseta landsins vegna skotárásar fyrr í vikunni. Þá skaut lögregla á námumenn af óþekktum ástæðum með þeim afleiðingum að 34 létu lífið. Í kjölfarið eru fjölmargar fjölskyldur komnar á vonar völ og óvissar um afkomu sína.