Assad í fyrsta sinn á opinberum vettvangi síðan í júlí

Bashar al-Assad, Sýrlandsforseti, birtist í landinu í fyrsta sinn opinberlega síðan í júlí þegar hann mætti í mosku í höfuðborginni Damaskus í gærmorgun. Með honum auk öryggisvarða voru forsætisráðherra landsins en varaforseti landsins var hvergi sjáanlegur.

Uppreisnin í landinu, sem hefur brotist út í borgarastyrjöld, hefur nú geisað í landinu í sautján mánuði. Assad hefur ekki komið fram opinberlega síðan skæð sprengjuárás var gerð á höfuðstöðvar öryggisstofnunar ríkisins í Damaskus hinn 18. júlí.