Hvetur Bandaríkjamenn til þess að láta af nornaveiðum sínum

Stofnandi WikiLeaks, Julian Assange, hvatti bandarísk stjórnvöld til þess að láta af nornaveiðum sínum í yfirlýsingu sem hann fór með á svölum sendiráðs Ekvadors í Lundúnum.

Assange hvatti stjórnvöld í Bandaríkjunum til þess að sleppa hermanninum Bradley Manning, sem er grunaður um að hafa lekið upplýsingum um sendiráð Bandaríkjanna í WikiLeaks.

Hann þakkaði að auki forseta Ekvadors fyrir að veita sér pólitískt hæli en eins og kunnugt er stendur til að framselja Assange til Svíþjóðar vegna kynferðisafbrota.

Assange sagði að málfrelsið væri í hættu og þar af leiðandi heilsa allra ríkja.

Að lokum spurði hann hvort Bandaríkin myndu hverfa aftur til byltingarandans sem ríkti þegar Bandaríkin urðu frjáls, eða hvort það ætlaði sér að draga aðrar þjóðir inn í hættulega veröld kúgunar þar sem blaðamenn sætu þöglir hjá af ótta við ofsóknir.

Ekki er ljóst hvað tekur nú við hjá Assange. Bresk stjórnvöld hafa sagt að hann verði handtekinn yfirgefi hann sendiráðið. Verði það raunin þá má búast við því að Assange verði framseldur til Svíþjóðar, þar sem hann óttast að hann verið framseldur áfram til Bandaríkjanna.