Afmælisbragur á Einni með öllu

„Það er bara góð stemming fyrir hátíðinni enda veðurspáin með eindæmum góð alla helgina," segir Pétur Guðjónsson, talsmaður hátíðarinnar Einnar með Öllu sem fram fer á Akureyri um helgina. Í gær var strax komið mikið af fólki í bæinn og er tjaldsvæðið við Þórunnarstræti að verða fullt.

„Við leggjum meira upp úr þessu í ár út af 150 ára afmæli Akureyrarbæjar, þannig það verður svona smá afmælisbragur á þessu," segir Pétur. Hátíðin stílar mest inn á fjölskyldur og er dagskráin yfir helgina mjög fjölbreytt.

„Við verðum með unglingadansleik fyrir krakka á aldrinum 14 til 16 ára. Það er til að mæta því að unglingarnir komi með mömmu og pabba á hátíðina. Við viljum alveg fá unglingana, en helst viljum við fá fjölskylduna í heild. Það verða skemmtanir á torginu, lystigarðinum - það verður gríðarlega mikið í gangi um allan bæ. Við reynum að vera líka svolítið frumleg," segir hann og bætir við að skemmtistaðirnir í miðbænum verði opnir fram á nótt, líkt og aðrar helgar.

Ekki er vitað með vissu hversu margir hafa sótt hátíðina síðustu ár en Pétur segir að forsvarsmönnum hátíðarinnar gruni að aðsóknin verði góð. „Það hafa ekki verið neinar mælingar síðustu ár þar sem margir gisti á tjaldsvæðum og í heimahúsum. Þannig ég get engan veginn slegið á það. En við finnum það að bæjarbúar eru spenntari yfir því að vera heima."

Og löggæslan verður í góðum málum. „Við erum í mjög góðu samstarfi við lögregluna í bænum. Það er náttúrlega góð gæsla í kringum viðburðina þar sem íþróttafélögin er við störf. Svo verður lögreglan með sinn viðbúnað. En síðustu ár hefur þetta gengið rosalega vel og gæslan verið fullnægjandi," segir hann að lokum.

Hægt er að nálgast heimasíðu hátíðarinnar hér.