50 ár frá dauða Monroe

Hálf öld er í dag liðin frá því að bandaríska leikkonan Marilyn Monroe lést og er fjöldi dyggra aðdáenda þokkagyðjunnar nú samankominn í heimabæ hennar.

Þrátt fyrir að þokkagyðjan hafi verið skírð Norma Jeane Baker þekkja flestir hana undir nafninu Marilyn Monroe. Hún hóf feril sinn sem fyrirsæta en fékk samning við kvikmyndaver á fimmta áratug síðustu aldar. Í fyrstu voru hlutverkin ekki stór í sniðum en ekki leið á löngu þar til hún varð ein skærasta stjarnan í Hollywood. Allt í allt lék hún í tuttugu og níu fullgerðum kvikmyndum og þar að auki í myndinni Something's Got to Give sem ekki náðist að klára.

Það var þó ekki þessi velgengni sem vakti mesta athygli því einkalíf þokkagyðjunnar hefur ávallt verið á vörum fólks. Hún var þrígift og átti í ástarsambandi við marga heimsþekkta menn, þar á meðal hefur því verið haldið fram að hún hafi átt í leynilegu ástarsambandi við John F. Kennedy, fyrrverandi forseta Bandaríkjanna.

Síðustu ár ævi sinnar átti hún við veikindi að stríða og var orðin háð svefnlyfjum þar sem hún svaf illa sem ekkert. Hún fannst látin á heimili sínu í Los Angeles á þessum degi árið 1962, 36 ára að aldri, en talið er að of stór skammtur af lyfjunum hafi dregið hana til dauða. Það hefur þó oft leikið vafi á því hvort hún hafi framið sjálfsmorð með of stórum skammti en nýlega var greint frá því að AP fréttastofan hefði farið fram á að fá aðgang að skýrslum bandarísku alríkislögreglunnar um hana en var tjáð að þær væru horfnar.

Þó svo að hálf öld sé liðin frá andláti þessarar einstöku konu er hún allt annað en gleymd og verður það seint. Fjöldi dyggra aðdáenda þokkagyðjunnar er í dag samankominn í heimabæ hennar til að minnast tímamótanna og hafa kvenkynsaðdáendur klætt sig upp til að líkja ástrúnaðargoðinu og ekki er það spurt um aldur né fyrri störf.