Damiao með tvö og Brassar í úrslit

Brasilía tryggði sér í kvöld sæti í úrslitaleik knattspyrnukeppni karla á Ólympíuleikunum með 3-0 sigri á Suður-Kóreu.

Suður-Kórea veitti Brasilíumönnunum töluverða mótspyrnu framan af leik. Þurftu Suður-Ameríkumennirnir tvívegis að bjarga á síðustu stundu á fyrsta stundarfjórðungnum.

Brasilía komst yfir á 38. mínútu þegar Romulu skoraði. Skot hans úr nokkuð þröngu færi fór undir markvörð Suður-Kóreu sem hefði átt að gera miklu betur.

Suður-Kórea gerði réttmæta kröfu til vítaspyrnu snemma í síðari hálfleik en tékkneskur dómari leiksins, sem var afar vel staðsettur, lét leikinn halda áfram.

Hinn 23 ára Leandro Damiao skoraði tvö mörk á sjö mínútna kafla í fyrri hluta síðari hálfleiks og björninn í sjálfu sér unninn. Bæði mörk framherjans, sem er á mála hjá Internacional í heimalandinu, voru afar snyrtileg og ekki ólíklegt að kappinn verði kominn til stórliðs í Evrópu áður en langt um líður.

Brasilía mætir Mexíkó í úrslitaleik mótsins á Wembley á laugardag. Mexíkó lagði Japan 3-1 í hinum undanúrslitaleiknum.