Zlatan ætlar sér að taka tíuna af Nene

Sænski landsliðsmaðurinn Zlatan Ibrahimovic ætlar sér að fá tíuna hjá franska liðinu Paris Saint-Germain þótt að það sé treyjunúmer Nene, einnar aðalstjörnu liðsins. Það er því ekki enn ljóst í hvaða treyju Zlatan spilar hjá sínu nýja félagi á þessu tímabili.

Ibrahimovic spilar alltaf númer tíu með sænska landsliðinu en hann hefur ekki fengið að spila í tíunni með félagsliðum sínum þökk sé mönnum eins og Rafael van der Vaart hjá Ajax, Alessandro Del Piero hjá Juventus, Adriano hjá Inter, Lionel Messi hjá Barcelona og Clarence Seedorf hjá AC Milan.

Ibrahimovic átti að fá tíuna hjá AC Milan þegar Clarence Seedorf fór frá félaginu en var þess í stað seldur til franska liðsins Paris Saint-Germain.

„Það hefur ekkert verið ákveðið í hvaða treyjunúmeri ég spila en ef forráðamenn félagsins vilja gleðja mig þá vita þeir hvað þeir þurfa að gera," sagði Zlatan Ibrahimovic sposkur á blaðamannafundi.

Brasilíumaðurinn Nene var markahæsti leikmaður frönsku deildarinnar á síðustu leiktíð en hefur reyndar verið orðaður við Corinthians í heimalandinu. Guillaume Hoarau spilar númer níu hjá PSG og hefur boðið Zlatan númerið sitt en aðeins ef hann Zlatan biður sig um það á frönsku.