Brassarnir næstum því búnir að missa niður þriggja marka forystu

Brasilíumenn lentu í óvæntum vandræðum á móti Egyptalandi í fyrsta leik sínum í fótboltakeppni Ólympíuleikanna í London. Brassarnir skoruðu þrjú mörk á fyrsta hálftímanum en fengu á sig tvö mörk í seinni hálfleik og sluppu á endanum með eins marks sigur, 3-2.

Brasilíumenn hafa aldrei unnið gull á Ólympíuleikunum en leggja nú ofurkapp á að breyta því. Liðið er skipað mörgum stórefnilegum leikmönnum sem mörg stórlið Evrópu hafa elt á röndum undanfarna mánuði.

Rafael da Silva, leikmaður Manchester United, skoraði fyrsta mark Brasilíumanna á 16. mínútu eftir sendingu frá Oscari sá hins sama og Chelsea keypti í gær.

Leandro Damião, leikmaður Internacional í Brasilíu, skoraði annað markið á 26. mínútu og aftur átti Oscar stoðsendinguna. Aðeins fjórum mínútum síðar var Neymar búinn að bæta við þriðja markinu eftir sendingu frá Hulk.

Egyptar gáfust ekki upp og fyrirliðinn Mohamed Aboutrika og Mohamed Salah, leikmaður Basel í Sviss, minnkuðu muninn í 3-2 í seinni hálfleiknum. Seinna markið komið fjórtán mínútum fyrir leikslok en Egyptum tókst ekki að jafna leikinn og Brasilíumenn sluppu með nauman sigur.