Fimm þjóðir komnar áfram í kvennafótboltanum á ÓL

Fimm þjóðir eru búnar að tryggja sér sæti í átta liða úrslitum í kvennafótboltakeppni Ólympíuleikanna og það þótt að enn sé ein umferð eftir. Bandaríkin, Brasilía, Bretland, Svíþjóð og Japan eru öll komin í átta liða úrslitin eftir leiki dagsins.

Bandaríkin, Bretland og Brasilía hafa öll unnið báða sína leiki en markalaust jafntefli Svía og Heimsmeistara Japana nægði báðum þjóðum til að komast áfram. Hedvig Lindahl, markvörður Svía, átti algjört stórleik og bjargaði sínu liði í leiknum.

Bandaríkin vann 3-0 sigur á Kólumbíu, Bretland vann 3-0 sigur á Kamerún og þær brasilísku létu sér nægja að vinna 1-0 sigur á Nýja-Sjálandi. Cristiane skoraði eina mark Brassana og hefur því skorað í báðum leikjum liðsins eins og breska stelpan Steph Houghton og þær bandarísku Abby Wambach og Carli Lloyd.