Neymar, Pato og Oscar skoruðu allir í sigri Brasilíumanna - komnir áfram

Brasilíumenn eru komnir áfram í átta liða úrslitin í knattspyrnukeppni Ólympíuleikanna í London eftir 3-1 sigur á Hvít-Rússum í dag. Hvít-Rúsar komust í 1-0 í upphafi leiks en Brassar tryggðu sér sigur með tveimur mörkum í seinni hálfleik.

Renan Bressan kom Hvíta-Rússlandi í 1-0 á 8. mínútu en Alexandre Pato, leikmaður AC Milan jafnaði metin á 15. mínútu. Neymar kom Brössum síðan yfir á 65. mínútu og nýi leikmaðurnn hjá Chelsea, Oscar, innsiglaði síðan sigurinn í uppbótatíma.

Brasilíumenn unnu 3-2 sigur á Egyptum í fyrsta leik sínum og eru því með fullt hús og búnir að skora sex mörk í fyrstu tveimur leikjum sínum. Egyptar gerðu 1-1 jafntefli við Nýja-Sjálandi í hinum leik riðilsins.