Fórnarlamb segist ekki ætla að láta óþokka hrekja sig að heiman

Karlmaður á sjötugsaldri sem var bundinn og keflaður á eigin heimili í sex tíma segist ekki ætla að láta hræðsluna við óþokkana eyðileggja fyrir sér heimilið. Hann féllst á að lýsa atburðarrásinni en af tillitsemi við öryggi mannsins verður nafn hans ekki birt.

Það var aðfaranótt föstudagsins síðasta sem hringt var á dyrabjöllu mannsins, sem býr einn í einbýlishúsi í Breiðholti, þegar hann fór til dyra stóðu tveir menn í dyragættinni. Þeir réðust samstundis á hann og keyrðu hann inn í stofu.

„Mér er ýtt inn í stofu og settur í stól og límdur fastur til að byrja með. Svo er ég leystur til þess að fara í tölvuna, þar sem átti að láta mig millifæra fé með hótunum og illindum," lýsir maðurinn.

Mennirnir tóku líka kreditkort mannsins og kröfðu hann um pin-númerið. Þeir skildu því næst manninn eftir í húsinu bundinn og keflaðana á meðan þeir fóru út hraðbanka til að tæma öll kort. En fyrst pin-úmerin virkuðu ekki snéru þeir aftur

„Þeir komu alveg brjálaðir til baka, slógu mig og börðu og bundu mig í baðkarinu," segir maðurinn sem var látinn liggja í baðkarinu bundinn á höndum og fótum með límt fyrir munninn alla nóttina. Á meðan voru þrjótanir frammi, brjótandi og bramlandi, í leit að verðmætum. Svona var þetta alveg fram á morgun. Um sex klukkutíma alls.

„Síðan þegar bankar opna rýkur annar þeirra niður í Mjódd til þess að taka pening út. Í millitíðinni tekst mér að losa mig, en þá voru þeir búnir að festa hurðina þannig ég komst ekki út," segir maðurinn. „En síðan bíða þeir eftir að verða sóttir með ránsfenginn og klukkan er orðin tíu um morguninn. Ég er heppinn að eiga góða að, fólks sem saknaði mín. Þau komu, bönkuðu upp á, en þá ruku mennirnir út að aftanverðu með tölvu og sjónvarp og líklega eitthvað fleira," segir maðurinn klökkur.

Þótt þeir hafi náð að flýja var lögreglan fljót að finna mennina. Þeir sitja nú báðir í gæsluvarðhaldi og eiga þunga dóma yfir höfði sér. Okkar maður hefur tekið leyfi frá vinnu til að jafna sig, hann segist staðráðinn í að láta þennan atburð ekki buga sig og hyggst að flytja aftur inn á heimili sitt.

„Málið er að það er ekki hægt að vera heima eins og er, gott fólk er að reyna að gera það að heimili aftur. En svona lýð mun ekki takast að hræða mig frá heimilinu, það gengur ekki, ég ætla ekki að vera á flótta og þá verður maður bara drepinn eins og var hótað," segir maðurinn eftir þessa hrollvekjandi lífsreynslu.