Skurðaðgerðir við lungnakrabba skila góðum árangri

Árangur skurðaðgerða vegna lungnakrabbameins hér á landi er mjög góður í alþjóðlegum samanburði og lífslíkur þeirra sem gangast undir slíkar aðgerðir hafa batnað umtalsvert. Þetta kemur fram í grein íslenskra vísindamanna við Háskóla Íslands og Landspítala sem birtist nýverið í einu virtasta tímariti heims á sviði krabbameinslækninga, Journal of Thoracic Oncology.

Árlega greinast hátt í 150 einstaklingar með lungnakrabbamein og er það annað algengasta krabbameinið sem greinist hjá báðum kynjum, að því er fram kemur í tilkynningu frá Háskóla Íslands. Helsta úrræðið við lungnakrabbameini er skurðaðgerð þar sem æxlið er fjarlægt ásamt nærliggjandi lungnavef. Þessar aðgerðir eru oft umfangsmiklar og hafa stundum fylgikvilla.

Í grein íslensku vísindamannanna í tímaritinu Journal of Thoracic Oncology var kannaður árangur þessara aðgerða hér á landi á árabilinu 1994-2008. Greinin byggist á meistarverkefni Húnboga Þorsteinssonar, læknanema og nú kandídats á Landspítala, sem vann verkefnið undir handleiðslu Tómasar Guðbjartssonar prófessors. Aðrir höfundar voru læknarnir Steinn Jónsson prófessor, Helgi J. Ísaksson, Ásgeir Alexandersson, Guðrún Nína Óskarsdóttir og Rut Skúladóttir.

Niðurstöður sýna að árangur þessara aðgerða hér á landi er mjög góður á alþjóðlegan mælikvarða, en 99 prósent sjúklinga lifðu þær af. Einnig höfðu lífslíkur sjúklinga batnað umtalsvert á síðasta fimm ára tímabili rannsóknarinnar, sem er ánægjuleg þróun. Í rannsókninni kom jafnframt í ljós að af þeim 1530 sjúklingum, sem greindust með lungnakrabbamein á rannsóknartímabilinu, gengust alls 26 prósent undir skurðaðgerð. Það er hátt hlutfall miðað við önnur Evrópulönd og með því besta sem þekkist í heiminum. Til samanburðar hefur þetta hlutfall verið innan við 10 prósent á Englandi og undir 20 prósent annars staðar á Norðurlöndum. Í leiðara síðasta Journal of Thoracic Oncology er sérstaklega bent á þennan góðan árangur hér á landi og íslensku heilbrigðiskerfi hrósað.