Innlent

Nubo byggir á 1,4% af landi Grímsstaða sem keypt verður

Þorbjörn Þórðarson skrifar
Huang Nubo, sem er fyrrverandi embættismaður hjá kínverska ríkinu og núverandi stjórnarformaður  Zhong Kun Group, fyrir framan landakort af Íslandi á blaðamannafundi í Peking hinn 2. september 2011.
Huang Nubo, sem er fyrrverandi embættismaður hjá kínverska ríkinu og núverandi stjórnarformaður Zhong Kun Group, fyrir framan landakort af Íslandi á blaðamannafundi í Peking hinn 2. september 2011. Mynd/AFP
Huang Nubo mun ráðast í framkvæmdir á 1,4 prósentum af landinu Grímsstöðum á Fjöllum sem félagið GáF ehf. í eigu sjö sveitarfélaga mun kaupa og leigja honum síðan. Ögmundur Jónasson innanríkisráðherra óttast að uppbygging Nubos komi til með að kljúfa samfélag okkar í herðar niður, eins og hann kemst að orði. Samningar við Nubo um leigu á jörðinni eru á lokastigi. Hann ætlar að byggja hótel, eitt hundrað einbýlishús og golfvöll á svæðinu.

Sjö sveitarfélög á Norðurlandi stofnuðu í síðasta mánuði félagið GáF ehf. (stytting á Grímsstaðir á Fjöllum) en tilgangur félagsins er undirbúa kaup, eignarhald og leigu á hluta Grímsstaða til félags í eigu Huang Nubo. Stefnt er að því að leigutekjur muni standa undir kostnaði við kaup á landinu og er stefnt að því að félag Nubo staðgreiði leiguna fyrirfram til félagsins GáF sem noti síðan peningana til að borga fyrir jörðina, samkvæmt heimildum fréttastofu.

Heildarleiguverðið er nálægt 7,8 milljónum dollara, jafnvirði 990 milljóna króna.

Athafnasvæði Nubos verður þrír ferkílómetrar. Gerðir verða tveir samningar um jörðina. Annar þeirra er um uppbygginguna á athafnasvæðinu og hin um afnot af öðru landi. Þá verða ákvæði um ýmsar takmarkanir, eins og bann við framkvæmdum sem skemma útsýni.

Nubo fær 1,4 prósent af landinu sem keypt verður til afnota og uppbyggingar en 98,6 prósent verða lýst fólksvangur, sem þýðir að hver sem er mun eiga frjálsa för um svæðið og geta notið náttúrunnar þar.

Hann ráðgerir að reisa hótel og eitt hundrað einbýlishús, auk golfvallar. Hverjir koma til með að búa í þessum húsum? „Nú er það þannig að ég get ekki svarað því, en það sem er mikilvægt að halda til haga er að það svæði sem hann fær til ráðstöfunar hefur ekki verið skipulagt og hannað. Öll þessi skref sem nauðsynleg eru í þessu verður að stíga í samvinnu við skipulagsvaldið," segir Bergur Elías Ágústsson, sveitarstjóri Norðurþings.

Steingrímur á eftir að gefa grænt ljós

Svokallaður ívilnunarsamningur vegna uppbyggingarinnar hefur ekki verið undirritaður ennþá og er á borði iðnaðarráðherra.

Með honum fæst undanþága frá lagaákvæðum sem banna erlendum félögum að leigja land á Íslandi til langs tíma og þar eru jafnframt ákvæði um skattalegt hagræði.

Nefnd þriggja ráðuneyta, svokölluð ívilnananefnd, hefur þegar farið yfir drög að samningnum og mælt með honum. Það er helst á þessum stað þar sem ríkisvaldið gæti skipt sér af áformum Nubos, en Steingrímur J. Sigfússon, sem er nýlega tók við lyklavöldum í iðnaðarráðuneytinu, hefur ekki skrifað undir ennþá.

Til þessa hefur iðnaðarráðherra aldrei hafnað samningi sem ívilnananefnd hefur mælt með áður, en sex slíkir samningar hafa verið gerðir á grundvelli laga um ívilnanir vegna nýfjárfestinga, sem samþykkt voru 2010.

Þannig að það er eingöngu þessi ívilnunarsamningur þar sem ríkisvaldið gæti skipt sér af þessu ferli? „Já, ég held að það sé rétt," segir Bergur Elías Ágústsson.

Í öðru ráðuneyti, innanríkisráðuneytinu, er æðsti maður í brú andvígur fjárfestingu Nubos. Og stöðvaði áform hans í fyrra þegar hann hugðist kaupa jörðina Grímsstaði af landeigendum. Ögmundur Jónasson segir í samtali við Mbl í dag að hann óttist að áformin muni „kljúfa samfélag okkar í herðar niður" eins og hann kemst að orði. Ekki verður hins vegar séð að Ögmundur hafi heimildir til að beita sér gegn uppbyggingunni.

Bergur Elías Ágútsson segir að reiknað hafi verið út að 250 varanleg störf á heilsársgrundvelli skapist á Norðausturlandi í tengslum við fjárfestinguna. thorbjorn@stod2.is


Tengdar fréttir

Býst við niðurstöðu með haustinu

"Málið er í eðlilegum farvegi og við getum búist við niðurstöðu með haustinu," segir Þorvaldur Lúðvík Sigurjónsson, framkvæmdastjóri Atvinnuþróunarfélags Eyjafjarðar. Hann vill að öðru leyti ekki tjá sig um fréttir þess efnis að samkomulag um leigu kínverska fjárfestisins Huangs Nubo um leigu á landi að Grímsstöðum á Fjöllum sé í höfn. Nubo sagði í samtali við Bloomberg að samkomulagið yrði undirritað fyrir október.

Samningar við Huang Nubo langt komnir

Samningaviðræður félags Huangs Nubo við sex sveitarfélög á Norðausturlandi um kaup og leigu á Grímsstöðum á Fjöllum eru langt komnar. Huang segir að heildarfjárfesting hans hér á landi muni nema ríflega 25 milljörðum króna.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.