Fabregas: Bað boltann um að bregðast mér ekki

Cesc Fabregas var enn á ný hetja Spánverja þegar hann skoraði úr síðasta víti þeirra í vítakeppninni gegn Portúgal í undaúrslitum Evrópumótsins í kvöld.

„Ég hafði skrýtna tilfinningu fyrir vítakeppninni og ég velti vítaspyrnunum fyrir mér í eftirmiðdaginn. Að ég hafi fengið annað tækifæri á borð við þetta er ótrúlegt," sagði Fabregas.

Fabregas var í sömu stöðu í átta liða úrslitum Evrópumótsins fyrir fjórum árum. Þá kom Katalaninn af bekknum líkt og í dag og skoraði úr síðasta vítinu gegn Ítölum. Ítalir eru mögulegur andstæðingur Spánverja í úrslitaleiknum en liðið mætir Þjóðverjum í hinni undanúrslitaviðureigninni í Varsjá á morgun.

„Þegar ég steig á stokk til að taka spyrnuna sagði ég við boltann að við yrðum að skrá okkur í sögubækurnar og hann mætti ekki bregðast mér," sagði Fabregas sem átti upphaflega ekki að taka síðasta vítið.

„Þeir sögðu mér að taka vítaspyrnu númer tvö en ég neitaði þar sem ég hafði fengið þessa framtíðarsýn," sagði Fabregas.

Spyrna Fabregas hrökk af stönginni og í netið. Spánverjar komnir í úrslit á þriðja stórmótinu í röð og gætu orðið fyrsta þjóðin til þess að verja Evrópumeistaratitil sinn.