Sýna samfélagslega ábyrgð með því að taka nammibarinn niður

Eigendur Víðis-verslananna er nú að taka niður síðasta sælgætisbarinn í verslun sinni. Segja þeir með því vilji þeir sýna samfélagslega ábyrgð.

Erum hætt með "nammibar" í báðum búðum okkar. Verið velkomin í heilsusamlegri Víðir. Þetta segir í tilkynningu á Facebook-síðu Víðis í dag. Um leið eru viðskiptavinirnir minntir á grænmetis- og ávaxtamarkaðinn.

Í fréttum okkar í gær greindum við frá því að verslanir Krónunnar hafa komið upp ráðleggingum um hæfilega skammta á sælgæti. Fulltrúar Hagkaups sögðu að slíkt væri ekki á döfinni þar sem farið væri eftir öllum reglum.

Guðlaugur Þór Þórðarson, alþingismaður og fyrrverandi heilbrigðisráðherra, kallaði þá eftir samfélagslegri ábyrgð verslana. Ekki ætti alltaf að þurfa að setja boð og bönn um alla hluti.

Matthías Eiríksson, kaupmaður í Víði, segir að samfélagsleg ábyrgð hafi ráðið för við þá ákvörðun að taka sælgætisbarina niður í Víði.

Þá má nefna að í New York Times greindi frá því í síðustu viku bannað að yfirvöld þar ætluðu að banna sölu á gosdrykkjum í stórum ílátum á veitingahúsum og í bíóum til að reyna stemma stigu við offitu.

Geir Gunnlaugsson landlæknir sagði í samtali við fréttastofu í morgun að ekki stæði til að setja slík bönn hér á landi. Hann benti þó á tilmæli embættisins til kaupmanna um að endurskoða afsláttarkjör á sælgæti og íhuga einnig afslátt af hollari vörum, svo sem ávöxtum og grænmeti.