Ef einhver kastar í mig banana þá mun ég drepa hann

Ítalinn Mario Balotelli ætlar ekki að sætta sig við neitt kynþáttaníð á EM í sumar. Hann hefur nú hótað að labba af velli ef hann verður fyrir slíku á mótinu. Hann segir enn fremur að ef einhver myndi kasta banana í hann út á götu þá myndi hann drepa viðkomandi.

"Ef það kemur fyrir að einhver hendir banana í mig út á götu þá enda ég í fangelsi því ég myndi drepa þann mann. Kynþáttaníð er algjörlega ólíðandi og ég get ekki sætt mig við slíkt," sagði Balotelli við France Football.

"Það verða vonandi engin slík vandamál á EM því ef það gerist þá mun ég labba af velli og fara heim. Það er árið 2012 og svona má ekki gerast."

Balotelli fer um víðan völl í þessu opinskáa viðtali og hann talar meðal annars um að hann sé gáfaðari en flest fólk.

"Ég lít á mig sem snilling en ekki uppreisnarsegg. Ég trúi því að ég sé gáfaðari en meðalmaðurinn. Það er frábært að hafa fengið þessa hæfileika í vöggugjöf en líka erfitt því fólk vill alltaf dæma mann. Það eru fáir svona hæfileikaríkir þannig að það eru fáir sem geta í raun dæmt mig."