Torres valinn í spænska landsliðið

Fernando Torres og Juan Mata hafa verið kallaðir inn í spænska landsliðið nú þegar að tímabilinu þeirra með Chelsea er lokið.

Vicente Del Bosque valdi á dögunum 21 manna landsliðshóp fyrir vináttulandsleiki gegn Serbíu og Suður-Kóreu síðar í mánuðinum.

Del Bosque ákvað hins vegar að bíða fram yfir úrslitaleik Meistaradeildar Evrópu með að velja þá Torres og Mata. Chelsea varð sem kunnugt er Evrópumeistari eftir sigur á Bayern München.

Del Bosque mun einnig bíða með að velja leikmenn frá Athletic Bilbao og Barcelona þar til að úrslitaleikur spænsku bikarkeppninnar hefur farið fram á föstudaginn.

Hann mun svo tilkynna EM-hópinn sinn á sunnudaginn og kemur þá í ljós hvaða 23 leikmenn fara til Úkraínu og Póllands.

Spánn mætir Serbíu á laugardaginn og leikur svo gegn Suður-Kóreu á miðvikudaginn næsta. Báðir leikirnir fara fram í Sviss.

Óvíst er hvort að David Villa, leikmaður Barcelona, verði valinn en hann hefur verið lengi frá vegna meiðsla. Liðsfélagi hans, varnarmaðurinn Carles Puyol, mun þó missa af EM í sumar þar sem hann gekkst nýverið undir aðgerð á hné.