Villa missir af EM í sumar

Sóknarmaðurin David Villa mun ekki spila með Spánverjum á EM í sumar þar sem hann er enn að jafna sig eftir slæmt fótbrot.

Villa fótbrotnaði í leik með Barcelona í desember síðastliðnum en tilkynnti Vicente del Bosque, landsliðsþjálfara Spánar, að hann myndi ekki ná fullri heilsu fyrir mótið.

„Ég reyndi eins og ég gat en ég næ ekki að spila á EM í sumar," skrifaði Villa á Twitter-síðu sína í gær.

Þetta er vitanlega áfall fyrir Spánverja enda Villa markahæsti leikmaður spænska landsliðsins frá upphafi með 51 mark í 82 leikjum.

Liðsfélagi hans hjá Barcelona, varnarmaðurinn Carles Puyol, mun einnig missa af EM í sumar vegna meiðsla.