Hulk sá um Danina

Hulk, sóknarmaður Porto, var í aðalhlutverki hjá Brasilíu sem vann 3-1 sigur á Danmörku í vináttulandsleik þjóðanna í Hamburg í dag.

Hulk kom Brasilíu á bragðið strax á 8. mínútu og fimm mínútum síðar skoraði Niki Zimling, leikmaður Club Brugge, sjálfsmark.

Hulk var svo aftur á ferðinni fimm mínútum fyrir hálfleikinn og sá til þess að Brasilía hafði þriggja marka forystu í leikhléi.

Nicklas Bendtner minnkaði muninn fyrir Danmörku á 71. mínútu en lengra komust þeir dönsku ekki. Úrslitin vafalítið vonbrigði fyrir lærisveina Mortens Olsen í undirbúningi þeirra fyrir Evrópumótið í sumar.