Torres þakklátur Del Bosque

Spænski framherjinn Fernando Torres segist ætla að launa landsliðsþjálfaranum Vicente del Bosque fyrir traustið eftir að hann var valinn í spænska landsliðshópinn fyrir EM.

Torres hefur lítið sem ekkert getað með Chelsea og datt svo úr landsliðinu í febrúar. Héldu þá margir að hann myndi ekki fara á EM.

"Það var erfitt að missa sætið í landsliðinu. Ég skil samt vel af hverju það gerðist og vissi að það gæti farið þannig að ég missti af EM," sagði Torres.

"Vicente hefur sett mikið traust á mig og ég þarf að sýna honum að ég sé til í að leggja mikið á mig í staðinn."

Torres hefur skorað 27 mörk í 91 landsleik fyrir Spánverja.