Affelay: Hef styrkst andlega og líkamlega

Síðasta tímabil var ekki auðvelt fyrir Hollendinginn Ibrahim Affelay hjá Barcelona enda var hann meira og minna meiddur. Hann segist þó koma sterkari til baka.

Affelay er nýbyrjaður að spila á ný og komst í hollenska landsliðið fyrir EM.

"Fótboltamaður tapar aldrei tilfinningunni fyrir boltanum. Ég held ég sé ekki hættur að geta gert eitthvað ákveðið. Meiðslin hafa þvert á móti gert mig andlega og líkamlega sterkari," sagði Affelay.

"Ég var fljótur að finna minn leik eftir meiðslin og það er eðlilegt þegar maður æfir með bestu mönnum heims."

Affelay verður væntanlega í byrjunarliði Hollands á morgun er liðið leikur vináttulandsleik gegn Slóvakíu.