Terry hefur ekki heyrt frá Hodgson

John Terry veit ekki enn hvort hann fari með enska landsliðinu á EM enda hefur hann ekkert heyrt frá nýráðnum landsliðsþjálfara, Roy Hodgson.

Terry er í vandræðum utan vallar og dómsmál hangir yfir honum eftir EM vegna kynþáttaníðs. Svo eru einnig efasemdir um í hvaða formi hann sé en Terry átti hörmulegan leik gegn Liverpool.

Þess utan er ekki hlýtt á milli Terry og Rio Ferdinand enda var Terry með hið meinta kynþáttaníð í garð bróður Rios. Það er því ekki víst að Hodgson vilji taka þá báða með á EM.

"Ég hef ekki heyrt í neinum hjá enska landsliðinu. Það er líka í góðu lagi enda nóg að gera hjá Chelsea sem þarf að einbeita sér að," sagði Terry.

"Vonandi fæ ég samt kallið. Ég er alltaf tilbúinn að spila fyrir England."