Holland aftur Evrópumeistari U-17 liða

Hollendingar vörðu Evrópumeistaratitil sinn í flokki U-17 liða eftir sigur á Þýskalandi í úrslitaleik. Vítaspyrnukeppni þurfti til að knýja fram úrslit.

Þjóðverjar voru hársbreidd frá titlinum þar sem að Hollendingar jöfnuðu metin í uppbótartíma. Leon Goretzka hafði komið Þýskalandi yfir á 45. mínútu með skalla eftir hornspyrnu en Elton Acolatse jafnaði metin fyrir Hollendinga í blálok leiksins.

Leiktíminn í þessum aldursflokki er 80 mínútur og ekki er gripið til framlengingar heldur farið beint í vítaspyrnukeppni. Þar nýttu Hollendingar allar sínar spyrnur en Þjóðverjar brenndu af einni. Þá varði markvörðurinn Nick Olij frá varamanninum Marc Stendera.

Leikmenn Þýskalands voru margir óhuggandi eftir leikinn enda höfðu þeir verið betri aðilinn í leiknum. Þeir sofnuðu hins vegar á verðinum í uppbótartímanum og það reyndist þeim dýrkeypt. Markið sem Acolatse skoraði var það eina sem Þýskaland fékk á sig í allri keppninni.

Holland varð meistari í fyrsta sinn í þessum aldursflokki í fyrra og þá einnig eftir sigur á Þýskalandi í úrslitaleik. Þá fóru leikar 5-2 fyrir Holland.

Ísland var ein af þeim átta þjóðum sem tók þátt í úrslitakeppninni sem haldin var í Slóveníu. Strákarnir gerðu jafntefli við Frakka en töpuðu fyrir Þýskalandi og Georgíu og komust þar með ekki áfram úr sínum riðli.