Góður útisigur hjá Elísabetu

Kristianstad er komið á gott skrið í sænsku úrvalsdeildinni eftir 3-2 sigur á AIK í dag. Elísabet Gunnarsdóttir er þjálfari liðsins.

Katrín Ómarsdóttir og Sif Atladóttir voru í byrjunarliði Kristianstad. Sif spilaði allan leikinn en Katrín þurfti reyndar að fara af velli á 42. mínútu. Guðný Björk Óðinsdóttir er frá vegna meiðsla.

Þetta var annar sigur Kristianstad í röð og er liðið þar með komið með sjö stig eftir fimm leiki og er um miðja deild.

Edda Garðarsdóttir spilaði allan leikinn fyrir Örebro sem vann 3-0 sigur á Djurgården. Katrín Jónsdóttir og markvörðurinn Guðbjörg Gunnarsdóttir spiluðu allan leikinn með síðarnefnda liðinu.

Örebro er með sex stig í tíunda sæti deildarinnar en Djurgården er stigalaust á botni deildarinnar.