Maradona ætlar að virða samninginn við Al Wasl

Þó svo að Diego Maradona hafi á dögunum hótað því að pakka saman föggum sínum og hætta störfum sem knattspyrnustjóri Al Wasl segist hann nú ætla að virða samning sinn við félagið.

Maradona sagðist afar óánægður með að loforð hafi verið svikin og að félagið hafi ekki keypt þá leikmenn sem honum hafi verið lofað.

Maradona fundaði með eiganda félagsins í vikunni og var niðurstaðan sú að Argentínumaðurinn myndi halda áfram í starfi.

Félagið sendi frá sér yfirlýsingu þar sem ummæli Maradona voru hörmuð og að hann sjálfur gerir sér grein fyrir að þau voru ekki félaginu til bóta.

Sjálfur sagði hann að hann myndi ekki hætta og að hann væri spenntur fyrir næsta tímabili og að ná þeim markmiðum sem félagið hafi sett sér.

Maradona gerði tveggja ára samning við félagið og á eitt ár eftir af honum.