Samherji leggur þremur skipum vegna strandveiðibáta

Samherji hefur lagt þremur fiskiskipum og kaupir þess í stað afla á fiskmarkaði frá strandveiðibátum. Framkvæmdastjóri landvinnslu Samherja segir ólympískar veiðar strandveiðibáta hvergi hafa gefist vel og verð muni lækka til lengri tíma litið.

Strandveiðar hófust um allt land um mánaðarmótin og hafa hundruðir báta verið að veiðum síðustu daga í kapphlaupi við að ná sem mestu áður en aflamarki fyrir mánuðinn er náð. Þar af leiðandi hefur magn af þorski og ýsu á markaði aukist gríðarlega og mátti sjá verðlækkun strax í síðustu viku. Samherji hefur ákveðið að nýta sér þessa verðlækkun.

Eru þá engin Samherja skip á miðunum eins og staðan er núna?

„Það eru engin ísfisk-skip á miðunum frá Samherja þessa stundina, það eru þrjú þeirra bundin við bryggju. Það er þannig að í upphafi mánaðar í þessum strandveiðum er mikið framboð á markaði af fiski og við erum að nýta okkur það, leggjum þessum skipum á meðan og sjómennirnir eru heima en við kaupum hráefni á fiskmörkuðum," segir Gestur Geirsson framkvæmdastjóri landvinnslu Samherja. Hann segir fyrirtækið neyðast til þess að gera þetta, þar sem atvinna hefur verið flutt frá þeirra sjómönnum og yfir á smábátana.

„Það hefur hvergi í heiminum gefist vel að vera með ólympískar veiðar, stjórnlausar, í ákveðinn tíma, það gefur bara verðlækkun á mörkuðum og óvissa með gæði og annað, þannig að þetta er ekki verið að hámarka arðinn af auðlindinni það er alveg ljóst."

Hann segir að skipin liggi við bryggju í um það bil viku og þeim verði síðan að öllum líkindum aftur lagt í byrjun júní þegar strandveiðar ná hámarki aftur.

„Ég hefði miklu frekar viljað fá að veiða þennan fisk sjálfur og stjórna því hvenær hann er veiddur og af hvaða stærð og af hvaða gæðum heldur en að þurfa að kaupa hann af fleiri hundruð bátum sem maður veit ekki alveg hvernig meðferð á hráefninu er," segir Gestur og bætir við:

„Þegar atvinnan er flutt frá okkar sjómönnum yfir á smábáta þá verðum við að nýta það þegar það er gert. Ef að veiðin í strandveiðinni þróast eins og undanfarin ár þá er kúfurinn á henni fyrstu vikuna í hverjum mánuði, það má gera ráð fyrri að skipin liggi allavega fyrstu vikuna."