Spænskur slagur í úrslitum Evrópudeildarinnar

Athletic Bilbao og Atletico Madrid munu eigast við í úrslitaleik Evrópudeildar UEFA en undanúrslitum keppninnar lauk í kvöld.

Athletic Bilbao komst áfram eftir 3-1 sigur á portúgalska liðinu Sporting frá Lissabon. Fyrri leiknum lauk með 2-1 sigri Sporting í Portúgal og lengi vel stefndi í að leikurinn í kvöld yrði framlengdur.

En Fernando Llorente reyndist hetja Athletic þegar hann skoraði þriðja mark sinna manna á 88. mínútu leiksins og tryggði þeim þar með sæti í úrslitaleiknum.

Atletico Madrid stóð vel að vígi eftir 4-2 sigur á Valencia á heimavelli í fyrri leiknum en liðið gerði sér lítið fyrir og vann útileikinn einnig í kvöld, 1-0. Adrian skoraði markið á 60. mínútu.

Atletico verður reyndar án fyrirliðans Tiago í úrslitaleiknum þar sem hann fékk rauða spjaldið í leiknum í kvöld, fyrir að slá til Roberto Soldado, sóknarmanns Valencia.

Úrslitin:

Valencia - Atletico Madrid 0-1 (samanlagt 2-5)

0-1 Adrian (60.)

Athletic Bilbao - Sporting Lissabon 3-1 (samanlagt 4-3)

1-0 Markel Susaeta (17.), 1-1 Ricky van Wolfswinkel (44.), 2-1 Ibai Gomez (46.), 3-1 Fernando Llorente (88.).