Seldi nýrað úr sér fyrir iPhone og iPad

Skurðlæknir og fjórir aðrir menn hafa verið handteknir í Kína fyrir að hafa lokkað pilt til þess að láta fjarlægja úr sér nýrað og selja það. Hann keypti sér iPhone og iPad fyrir söluandvirðið, eftir því sem kínverska fréttastofan Xinhua greinir frá. Pilturinn er sautján ára gamall og er kallaður Wang. Hann mun vera alvarlega veikur eftir að nýrað var fjarlægt og versnar ástand hans stöðugt.

Einn hinna ákærðu mun hafa þegið um 4,5 milljónir króna fyrir að skipuleggja nýrnaaðgerðina. Af því fékk unglingurinn um 450 þúsund krónur en hinu skiptu allir þeir sem ákærðir eru á milli sín. Ekki hefur verið greint frá því hver greiddi fyrir nýrað.

Wang er úr Anhui-héraðinu, en það er eitt fátækasta héraðið í Kína.