Hrikalegt ástand í Sýrlandi

Óttast er að átökin í Sýrlandi kunni að stigmagnast eftir að til skotbardaga kom milli stjórnarhermanna og uppreisnarmanna við landamæri Tyrklands og Sýrlands. Hermennirnir eru sakaðir um að hafa skotið yfir landmærin með þeim afleiðingum að einn flóttamaður féll og fimm særðust.

Atvikið átti sér stað í morgun eftir að uppreisnarmenn réðust á stöðvar stjórnarhermanna við landamæri Sýrlands og Tyrklands. Að minnsta kosti sex hermenn féllu í árásunum.

Stjórnarherinn svaraði með því að skjóta yfir landamærin á búðir flóttamanna í Tyrklandi með þeim afleiðingum að einn féll og fimm særðust.

Þá kom einnig til átaka við landamæri Sýrlands og Líbanon. Einn maður var skotinn til bana, tökumaður á vegum líbönsku fréttastofunnar Al Jadeed.

Sérfræðingar óttast nú að átökin í Sýrlandi kunni að stigmagnast og jafnvel breiðast út til nærliggjandi landa.

Vopnahlé sem átti að ganga í gildi í landinu á morgun er nánast úr sögunni eftir árásirnar í morgun en um níu þúsund hafa látið lífið frá uppreisnin hófst í Sýrlandi í mars á síðasta ári.