Vonbrigði að tillögu Bjarna skuli hafa verið vísað frá

„Þetta voru vonbrigði, en ég get ekki sagt að þetta komi endilega svo mikið á óvart," segir Birgir Ármansson, þingmaður Sjálfstæðisflokksins og fulltrúi flokksins í stjórnskipunar- og eftirlitsnefnd Alþingis. Hann segir að sjálfstæðismenn hafi grunað að fylgjendur ákærunnar gegn Geir hafi verið búnir að tryggja máli sínu stuðning þegar tillaga Bjarna Benediktssonar um að fella málið niður var afgreidd út úr stjórnskipunar- og eftirlitsnefnd með þeirri niðurstöðu að vísa ætti tillögu Bjarna frá.

Birgir sagði í Reykjavík síðdegis í dag að samt sem áður hafi sjálfstæðismenn vonast til að tillaga um að fella ákæruna niður fengi örlítið meiri stuðning. Margir þingmenn hafi breytt um stefnu frá því að frávísunarkrafa á tillögu Bjarna var lögð fram í lok janúar og felld. „Það hefur verið þannig bæði innan Samfylkingarinnar og VG að þeir þingsmenn sem tóku það í mál núna í janúar að þetta mál fengi efnislega meðferð í þinginu, þeir hafa verið undir stanslausum árásum og það er eiginlega eina skýringin sem ég get ímyndað mér á sinnaskiptum nokkurra í Samfylkingunni," sagði Birgir.

Birgir segir að réttarhöldin muni nú hafa sinn gang og hann voni og treysti því að þau fari vel og skikkanlega fram. „Ég ber traust til landsdómsmanna allra að þeir komist að réttri niðurstöðu, sem ég held reyndar að verði Geir hagfelld," sagði Birgir. Hann sagði að Alþingi hefði ákæruvald, hefði tekið ranga ákvörðun haustið 2010 um að ákæra Geir og nú hafi verið tækifæri til að leiðrétta það. „Meirihluti þingsins lét það tækifæri fram hjá sér fara og við það verður auðvitað bara að búa," segir Birgir.