Kortaþrjótarnir komu fullkomnum afritunarbúnaði fyrir

Valitor segir í tilkynningu að í flestum tilvikum komust rúmensku kortasvikararnir yfir upplýsingar um debetkort, en sú fjárhæð sem tókst að svíkja út í heildina, er ekki há.

Valitor gerði strax ráðstafanir til þess að tryggja að þeir korthafar sem í hlut eiga yrðu ekki fyrir tjóni. Fylgt var sérstöku öryggisferli sem fer í gang ef mál af þessu tagi koma upp, en Valitor hefur fyrst íslenskra fjármála- og greiðslukortafyrirtækja hlotið alhliða öryggisvottun sem sérstaklega er ætlað að taka á kortasvikum.

Það var í síðustu viku sem það komst upp um tilraun til kortasvika hér á landi. Tveir menn, sem urðu uppvísir að því að afrita kortaupplýsingar ásamt Pin-númerum úr hraðbönkum á höfuðborgarsvæðinu, sitja nú í gæsluvarðhaldi.

Kortasvikararnir eru erlendir ríkisborgarar sem komu hingað til lands í febrúar.

Þeir komu fyrir fullkomnum afritunarbúnaði í hraðbönkunum, annars vegar til að lesa segulrendur á greiðslukortum og hins vegar settu þeir upp myndavélar til að ná myndum af innslætti Pin-númera. Þrátt fyrir aðfarir þeirra, komst upp um athæfið og handtók lögreglan þá í kjölfarið.

Unnið er að því hér á landi að efla öryggi kortaviðskipta með innleiðingu örgjörva í öll greiðslukort ásamt tilheyrandi örgjörvalesurum hjá bönkum og söluaðilum. Þessum aðgerðum er m.a. ætlað að koma í veg fyrir afbrot af því tagi sem átti sér stað um helgina segir í tilkynningu frá Valitor.

Samkvæmt upplýsingum fréttastofu komust þrjótarnir yfir upplýsingar á þriðja þúsund korta hjá tveimur kortafyrirtækjum. Hraðbankarnir voru í miðborg Reykjavíkur.