"Við erum þeirra óvinur"

Karl Steinar Valsson, aðstoðaryfirlögregluþjónn, segir að lögreglan sé aðal óvinur skipulagðra glæpagengja. Átak yfirvalda um að fjölga lögreglumönnum á síðasta ári hafi reynst vel og árangurinn sé góður.

Karl Steinar var í viðtali við þáttinn Reykjavík síðdegis á Bylgjunni í dag. Hann segir að á skömmum tíma hafi miklar breytingar átt sér stað í íslensku glæpasamfélagi. „Við erum að sjá vélhjólagengi og við erum að reyna skilgreina þau frá þessum hefðbundnu vélahjólahópum, sem brjóta ekki af sér. Þess utan eru miklu fleiri skipulagðir brotahópar, við erum með þá sem hafa unnið hér í langan tíma í allskyns brotastarfsemi og svo erum við með erlenda brotahópa sem hafa komið sér fyrir."

Almennt eru erlendu glæpahóparnir skipulagðari en þeir íslensku. „Þeir íslensku eru þó misjafnir. Það eru til hóopar sem eru talsvert skipulagðir. Það er eitt af þeim einkennum sem okkur finnst blasa við, það er að þeir erlendu hafa miklu meira skipulag í kringum sig," segir hann. Hann segir að lögreglan hafi fundið í húsleitum hjá glæpahópum, upplýsingar um lögreglumenn og myndir af vinnuaðstöðu þeirra. „Þar eru menn að kynna sér okkar hlið. Það er eitt af einkennunum. Við erum þeirra óvinur. Við vinnum að því að þeir þurfi að standa frammi fyrir lögum og reglum samfélagsins, það er þeim ekki þóknanlegt."

Hægt er að hlusta á viðtalið við Karl Steinar í hljóðbrotinu með þessari frétt.