Rekinn af velli fyrir að fara úr treyjunni | Koeman brjálaður

John Guidetti, 19 ára framherji Feyenoord, reif sig úr treyjunni þegar hann kom liði sínu yfir í deildarleik gegn Waalwijjk um helgina. Honum var refsað með gulu spjaldi, hans síðara í leiknum, og manni fleiri jöfnuðu liðsmenn Waalwijjk undir lokin.



Atvikið má sjá með því að smella hér.

Mark Guidetti kom á 76. mínútu og var fögnuður heimamanna mikill. Brosin hurfu þó snögglega þegar ljóst var að Guidetti yrði vikið af velli. Óhætt er að segja að Ronald Koeman, stjóri Feyenoord, hafi trompast á hliðarlínunni þegar hann sá Svíann klæða sig úr treyjunni.

Feyenoord varð af mikilvægum stigum í toppbaráttunni í efstu deild hollenska boltans. Liðið situr í fjórða sæti með 41 stig, fjórum stigum á eftir toppliðunum PSV Eindhoven og AZ Alkmaar.

Guidetti, sem er í láni frá Manchester City, hefur farið á kostum á leiktíðinni og skorað átján mörk í sextán leikjum. Hann virðist þó ekki vera beittasti hnífurinn í skúffunni ef marka má fagnaðarlæti hans.